me la .rug.

.i la .filip.dik. finti

.i xe fanva fu la .zaifir.

ni'o lo'u .rug. le'u se cusku le gerku .i ri cpana punji le jamfu le bitmu gi'e ru'u catlu .i pa cmima be la'i .rug. cei broda mo'ifa'a bajra le purdi .i cerni pu'o lonu le solri ga'u muvdu .i le vacri cu lenku je grusi .ije lei bitmu be fo le zdani cu cilmo .i le gerku goi ko'a ve'i kargau lei xedja ca lonu catlu .i lei jamfu noi barda je xekri cu jgari le mudri pe le bitmu .i le broda goi ko'i sanli vi le bimvrogai gi'e ne'i catlu le purdi .i ko'i noi cinla je blaci je tuple desku cu cmalu broda .i ko'i kalgaisligau fa'a ko'a .i ko'a jarco tu'a lei denci .i lo'u .rug. le'u za'ure'u se cusku ko'a .i le sance cu se mirsna ve'a le smaji ke milxe manku .i noda muvdu .i ko'a ni'a klama gi'e dzukla le serti be le tsina fo le purdi .i ko'a zutse le terserti poi traji loka dizlo ku'o gi'e catlu ko'i .i ko'i sutra catlu ko'a .i bazibo ko'i mo'iga'u tengau le cnebo le canko be le zdani be'o noi gapru ku'o gi'e panzga fa'a ri .i le gerku mo'ifa'a sutra klama fo le purdi .i ko'a janli le bitmu seri'a lonu le bimvrogai cu desku je pe'a cmoni .i ko'i ca'o to'o dzukla fo le purdi dzuklaji tai lozu'o cizra je cmalu stapa .i ko'a noi vasxu gunka cu vreta re'o le bimvrogai tanbo .i le tance noi xunre cu dandu .i ko'a catlu lonu ko'i canci

ni'o ko'a smaji vreta .i lei kanla pe ko'a carmi je xekri .i co'a donri .i le tsani cu zenba loka blaci kei li so'u .ije ru'u mirsna lei sance be loi prenu ve'a le cerni vacri .i co'a gusni fi le trixe be le canko gacri .i lenku cermurse .i cabo lo canko cu se kargau .i ko'a na'e muvdu zukte .i ko'a catlu le dzuklaji

ni'o bu'u le jupku'a la .fetspes.kardosis. goi ko'o tisyse'a le djacu le kafpatxu .i le jaurgapci cu galmu'u seri'a lonu ko'o ze'i na'e viska .i ko'o punji le kafpatxu le jupsfe gi'e klama le cidja te sorcu .i ca lenu ko'o xrukla kei la .alf. goi ko'u cu sanli vi le vrogai pe le jupku'a .i ko'u daspu'i le barkalyle'o .i ko'u cusku lu xu do bevri le karni li'u .i lu ri bartu li'u co'e .i ko'u mo'ipa'o dzukla fo le jupku'a gi'e to'e telgau le trixe vrogai gi'e fe'e co'a stapa le tsina .i ko'u catlu le grusi je cilmo cerni .i re'o le bitmu la .boris. noi xekri je mutce loka selkre zi'e noi se tance le dandu cu vreta .i lu ko ne'i punji le tance li'u se cusku la .alf. i le gerku ga'u sutra catlu .i le rebla cu te darxi fe le loldi .i ko'u cusku lu .i .e'o me le tance .i ko ne'i punji le tance li'u .i ko'a ce ko'u simxu lenu catlu .i ko'a cmoni .i le kanla be ko'a cu se bilma carmi .i lo'u .rug. le'u smaji se cusku ko'a .i ko'u cusku lu ke'o li'u gi'e ru'u catlu .i lu xu da fa'a klama .i xu le karni bevri cu go'i li'u se cusku ko'u .i ko'a catlu ko'u .i le moklu cu kalri .i lu za'a ju'o do ze'a di'i xanka li'u se cusku ko'u .i lu .e'u ko surla .i leni mi'o tolcitno cu dukse fi lonu cinmo li'u go'i .i ko'u klama le zdani

ni'o le solri mo'u gapkla .i le klaji cu se gusni je pe'a skari bo jmive .i le xelmri ku joi lei xatra je karni cu klama fo le dagmlaterdzu .i so'o lo verba noi cmila ja tavla cu zo'a sutkla

ni'o li papa tcika lonu la .fetspes.kardosis. no'u ko'o brulu'i le crane tsina .i ko'o ze'i denpa je panzga le vacri .i lu .uiro'o za'a lonu ca se sumne cu pluka .ika'u ri'abo le tcima ba glare li'u se cusku ko'o

ni'o le xekri gerku no'u ko'a cu tcena vreta ni'a le tsina fi'o tcini loza'i dormidju ke solri glare .i le cutne be ko'a cu slilu .i lei cipni goi fo'a cu kelci bu'u le ricrceraso .i lu'i fo'a simxu lonu cmoni je krixa .i la .boris. so'uroi lafti le stedu gi'e catlu fo'a .i bazibo ko'a sanli gi'e dzukla le cnita be le tricu

ni'o ko'a sanli ne'i le tricu ca lonu ko'a viska lonu lei re broda goi fo'e zutse le bitmu gi'e catlu ko'a .i le pamoi be fo'e goi fo'i cu cusku lu ta barda fi le so'emei be la'i .bandus. li'u .i le remoi goi fo'o cu sedmu'utu'i .i le stedu cu desku se sarji le cnebo .i la .boris. noi na'e muvdu zi'e noi le xadni be ke'a tinsa cu catlu fo'e .i fo'e smaji gi'e catlu le barda gerku noi le blaci kerfa cu sruri le cnebo be ke'a .i fo'i cusku lu le friti kabri cu mo .i xu ri zi culno li'u .i lu go'i .i bazi bredi li'u se cusku fo'o noi sedmu'utu'i .i fo'i cladu zmadu cusku lu ju'i .i xu do tirna tu'a mi .i mi'o jdice lodu'u mi'o su'ore'u cpacu le se friti .i ko ba morji tu'a lonu ko curmi lonu mi'o nerkla .i .e'oga'u ko na'e xalbo li'u .i lu ga'u ko na'e tolmorji li'u se cusku fo'o .i lu baza co'e li'u go'i .i la .boris. na'e cusku

ni'o fo'e mo'ini'a plipe fi le bitmu gi'e fe'eza'o klama le dzuklaji .i pa fo'e cu tolse'a le cartu .i fo'e tadni ri .i fo'i cusku lu .i'enai le vi canlu cu na'e mapti lenu pare'u cipra .i za'a du'e le cmima be la'i .bandus. cu co'e .y .i zu'u le berti canlu li'u .i lu ta'a tu pu jdice .i lei tcila cu so'emei li'u se cusku fo'o .i lu .ieju'o li'u co'e .i fo'e sutra catlu la .boris. no'u ko'a gi'e to'o vi klama le bitmu .i ko'a na'e kakne lonu le remei ca'o tavla .ibazibo fo'e setca le cartu pe vo'a gi'e to'o klama fo le pluta .i ko'a dzukla le bitmu gi'e panzga vi lei tanbo .i ko'a te panci lo broda le titla je fusra

ni'o ca lenu la .alf. no'u ko'u cu xrukla le zdani ti'u le zi nicte kei le gerku cu sanli ne'a le bimvrogai gi'e vi ve'a catlu le dzuklaji .i ko'u kargau le bitmu gi'e nerkla le purdi .i ko'u cusku lu do mo li'u ca lonu satre darxi le cutne be ko'a .i go'i fa lu .i xu do co'u se raktu .i za'a do ze'i ca xanka .i .uanai do ze'e pu na'e go'i li'u .i ko'a cmoni gi'e fa'a carmi catlu le flira pe ko'u .i lu do .iu xamgu gerku doi .boris. li'u se cusku ko'u .i lu .i ji'a do barda fi lo gerku .i do na'e morji fi lo pu za'i do cmalu cityge'u li'u go'i .i ko'a salpo vreta le tuple be ko'u .i lu do .i'e xamgu gerku .i .o'unairu'e mi djica lonu djuno lodu'u do pensi makau li'u se smaji cusku ko'u

ni'o ko'u nerkla le zdani .i la .fetspes.kardosis. no'u ko'o bregau le jubme lemu'e citka le vacysai .i ko'u nerkla le surku'a gi'e na'e dasni le kosta .e le mapku .i ko'u punji le cidja tanxe le mlana jubme gi'e xrukla le jupku'a .i ko'o cusku lu ma raktu li'u .i lu .o'unai mi djica lonu ta noi gerku cu sisti lo ta'e zu'o jai vruri'a je gercmo .i ba'a lei jbixa'u za'ure'u pante fi lei pulji li'u co'e .i lu mi na'e pacna lonu mi'o bilga lonu dunda ta le bruna be do li'u se cusku ko'o noi kucysimgau le'i birka .i lu .i ku'i ta ta'e jai fenki fi'o tcini ra'u lonu mumdei cerni ti'u lonu lei festi vimcu cu klama li'u go'i .i la .alf. cusku lu .i la'aru'e ta goi ko'a ba surla li'u .i ko'u jelgau le tu'ursigja gi'e sigva'u sekai loka junri .i lu .i za'a ko'a pu ta'e na'e go'e .i .o'a la'aru'e ko'a ba xagze'a tai la'e di'u li'u co'e .i lu .i mi'o ba facki li'u se cusku ko'o

ni'o le solri noipe'a lenku je nupre cu gapkla .i lei tricu ku jo'u lei dizlo cu bumru .i ca mumdei cerni .i le xekri gerku no'u ko'a vreta je tinju'i ni'a le tsina .i lei kanla cu mutce be loka kalri je catlu .i lei kerfa cu tinsa ri'a tu'a le bislunsa .i le se vasxu noi se vikmi fo lei terzbi cu binxo lei dilnu va'o lei toldenmi vacri .i ko'a bikla ke stedu muvgau ke'e ce'o sanli .i vu sance tai le no'a be lonu janli .i lo'u .rug. le'u se krixa la .boris. noi ru'u catlu .i ko'a sutkla le bimvrogai gi'e sanli .i lei jamfu cu cpana le bitmu .i rere'u vu lauzma sance le jbimau .i la'edi'u janli je jimdaxsna ri'a da'i lonu le la'acu'i vrogai cu mo'iti'a gunro ja kargau .i lo'u .rug. le'u se krixa la .boris. noi xanka catlu lei canko noi manku .i noda muvdu .i bazibo lei broda cu klama fo le klaji .i lei broda goi ko'e ge'u joi le bevma'e cu muvdu gi'e se minra lei rokci seri'a loinu janli ja desku sance .i la .boris. krixa lo'u .rug. le'u gi'e fengu plipe .i ko'a bazi zenba loka smacni .i ko'a ni'a klama gi'e vreta le loldi gi'e tinju'i denpa .i ko'e za ca'u sisti lozu'o sazri le bevma'e .i ko'a tirna lenu ko'e kargau lei vrogai gi'e cpare lo cnita seka'a le dagmlaterdzu .i ko'a mo'iru'u bajra gi'e cmoni .ije le flira cu za'ure'u carna fi le zdani

ni'o ne'i le sipku'a noi kufygla je manku ku'o la .nakspes.kardosis. no'u ko'u co'i no'e vreta le ckana gi'e troci lomu'e viska le junla .i lu ta se mabla gerku li'u se cusku ko'u .i lu .i ke'u ta se mabla gerku li'u go'i .i ko'u cargau le flira fo le kicne gi'e ga'orgau lei kanla

no'i lei broda no'u ko'e ca'o klama fo le pluta .i le pamoi be ko'e catke le bimvrogai .i ri kalri .i ko'e nerkla le purdi .i ko'a mo'iti'a klama gi'e krixa lo'u .rug. rug. le'u .i le panci be lu'a la'i .rug. be'o noi rigni je kurki cu se sumne ko'a .ije ko'a to'o cargau .i fo'i cusku lu le friti kabri zo'u culno pe'i li'u .i go'i lu ki'e zo'o do'u do xendo li'u le fengu gerku .i ko'e jbikla le jinme kabri .i pa ko'e vimcu le gacri .i lo'u .rug. rug. le'u se cusku la .boris. noi re'o jgari le loldi be le serti be le tsina .i ko'a desku ri'a loli'i terpa .i ko'e ca'o lafti le barda ke jinme kabri gi'e cargau ri .i lei selvau cu preja le loldi .i ko'e crepu le pelji dakli noi punli je porpi ku'o gi'e troci crepu le najnimre ke pilka jo'u selpo'i .e le cmalu spisa be le jelnanba be'o .e le sovda calku .i pa ko'e setca pa le sovda calku le moklu gi'e denci jai marxa ra .i ko'a sezysku la'aru'e ke badri krixa lo'u .rug. le'u .i ko'e bazi mo'u crepu le selfriti .i ko'e ze'i denpa gi'e catlu la .boris. i bazibo sekai loka masno je smaji kei ko'e mo'iga'u catlu le mlana be le zdani be'o ku ce'o le bitmu drudi fa'a le canko noi se gacri le bunre .i ko'a camki'a lo'u .rug. le'u .ije ko'a co'a klama ko'e tai lonu pe'a dansu ri'a loza'i fengu je dunku .i ko'e to'e djica cargau fo na'ebo le canko .i ko'e cliva fi le bimvrogai gi'e ga'orgau ri .i lu .ionai ko catlu ta li'u se cusku le romoi be lu'i ko'e be'o noi co'a janco bevri le vi kojna be le boxfo .i ko'a noi ca'o cunso batke cu catke re'o le bitmu .i le traji be loka barda beifo ko'e goi fo'u co'a sutra sligau lei birka .i ko'a mo'iti'a klama gi'e vreta ne'a le loldi be le tsina serti .i le moklu be ko'a za'o kalri .i ko'a carmi cmoni fi loka badri je tolpa'a .i lu ko klama li'u se cusku le drata be le broda be'o fo'u noi stali re'o le bitmu .i ko'e mo'ito'o dzukla fo le pluta

ni'o fo'u cusku lu .i'e le vi canlu mo'u te crepu .i po'o to'e mupli fa lei vi cmalu canlu be lai .bandus. i mi ba gleki lonu da'i ta noi cmima la'i .bandus. cu jai mulno .i ju'o ta di'i jai raktu mi'o li'u .i lu ko geirde'a li'u se cusku pa ko'e .i ri cisma gi'e cusku lu .i zo'o le mi'o bevma'e mo'u culno .i .e'u mi'o denpa le bavlamjeftu fo da li'u .i ro ko'e cmila .i ko'e noi bevri le friti noi se bakfu le toljinsa je cludandu cu ca'o klama fo le pluta

fa'o

lujvo

© 2020 Wolfgang Corcoran-Mathe. Released under a Creative Commons Attribution 4.0 International license.

Home