me le litru

.i xe fanva fu la .zaifir.

.i le cmalu nanmu goi ko'a tatpi .i ko'a catke klama pa'o le tcana balku'a noi predenmi fe le ca'orzai be lo pikta .i ko'a xanka denpa le me ko'a moi nu se selfu .i leka tatpi cu se sinxa leza'i lei janco .e le bunre kosta cu to'e trati .i lu doi za'umoi li'u se ke smaji rufsu cusku la .ed.djakybsyn. noi pikta vecnu zi'e goi ko'i .i ko'a punji le rupnu be li mu pledi'i le kajna .i lu .e'o ko dunda fi mi lo cnino ke pikta selpapri .i ba'o xaksu le slabu li'u .i ko'a catlu zo'a la .djakybsyn le bitmu junla .i lu je'upei mutce lerci li'u .i ko'i cpacu le pledi'i gi'e cusku lu je'e doi .naun. i pa lo pikta selpapri .i ma se klama li'u .i lu la .makyn.xaits. li'u se cusku ko'a

.i lu ka'u la .makyn.xaits. li'u

.i ko'i lanli le cartu .i lu lu la .makyn.xaits li'u cmene noda li'u se cusku ko'i

.i ko'a jarco leka se fanza .i lu .i'enai zo'opei li'u

.i lu doi .naun. noda se cmene lu la .makyn.xaits. li'u .i .o'oru'e mi kakne lenu vecnu lo pikta befi da do .ijo da stuzi li'u

.i lu .uanai ke'o .i mi xabju zo'e li'u

.i lu .a'unai lezu'o mi di'i vecnu loi pikta cu nanca li xa .i se'o no le stuzi cu se cmene li'u se cusku ko'i

.i lei kanla be ko'a fe'eza'o kalri ri'a lenu se spaji .i lu .i ku'i tu stuzi le zdani be mi .i mi klama ri di'i ro lo nicte .i mi li'u

.i lu ta'a do'u ko cpacu li'u .i ko'i dunda le cartu ko'a .i lu ko facki li'u

.i ko'a lacpu muvgau le cartu le mlana gi'e fenki tadni ra .i le degji cu desku ca'o lenu ko'a tcidu le liste be le'i tcadu .i lu xu do facki li'u preti fi ko'i noi vreta punji lei birka le kajna .i lu .i .iepei ta na te cartu li'u go'i .i ko'a se cfipu sligau le stedu gi'e cusku lu .i .uanai na'e mapti .i da toldra ju'o seldicra sa'a li'u .i ko'a suksa canci .i le cartu farlu le drudi .i ko'a na'e zvati .i lu .uecai li'u se basna ko'i .i le moklu cu slilu fi leza'i kalri ku ce'o leza'i ganlo .i le po'o cartu noi vreta le drudi cu stali .i le cmalu nanmu puzi co'u zasti

ni'o lu ma balvi li'u preti fi la .bab.paen. goi ko'o

.i lu mi mo'iru'u klama gi'e crepu le cartu li'u

.i lu xu ta goi ko'a na'e zvati li'u go'e

.i lu ju'o go'i li'u se cusku ko'i

.i la .djakybsyn. lumci satre le mebri .i lu .a'o da'i do pu zvati .i suksa fa lenu ko'a canci .i mulno .i na'e nu sance ja muvdu li'u

.i ko'o noi sa'orgau zutse le stizu cu jelgau le sigja .i lu xu do pu su'oroi zgana ko'a li'u

.i lu na go'i li'u

.i lu ma tcika le fasnu li'u

.i lu le simlu be le cabna .i li ji'i paze co'e li'u .i ko'i co'a klama le canko gi'e cusku lu .i .e'e lei prenu cu fa'a klama li'u

.i lu .a'u la .makyn.xaits. li'u se cusku ko'o noi lanli le tcadu ke gidva cukta pe le gugypau .i lu .i ri na'e cmima le jorne be le'i se liste be lei cukta .i fi'o tcini lenu da'i ta tolcanci kei mi djica lenu tavla ta .i ko jai bapli lenu ta klama le briju li'u go'i

.i lu je'e .i mi na'e djica lonu mi bu'a ta .u'e .aunai li'u se cusku ko'i noi carna fa'a le canko .i lu re'i doi .nim. li'u go'i

.i le ninmu cu cusku lu .e'o re lo cupli'u pikta fi tu'a la .luesbyrg. li'u

.i ko'o satre fagystigau le sigja gi'e jelgau le za'umoi .i ko'o cusku lu mi ca'o krici ledu'u mi pu zgana tu'a le cmene li'u .i ko'o sanli gi'e dzukla le bitmu cartu gi'e cusku lu .i ku'i ri na'e te cartu li'u

.i ko'i cusku lu ta na'e te cartu ki'u leza'i ta na'e zasti .i .o'onai xu do jinvi ledu'u cumki fa lezu'o mi vi sanli di'i lei djedi gi'e vecnu loi pikta kei .e leza'i mi na'e djuno kei li'u .i ko'i xruti carna le canko gi'e cusku lu re'i doi .naun. li'u

.i lu .e'o mi djica tu'a lo pikta selpapri pe la .makyn.xaits. li'u se cusku le cmalu nanmu noi xanka ke sutra catlu le bitmu junla .i lu .i ji'a ko sutra li'u go'i

.i ko'i ga'orgau lei kanla gi'e jgari le kajna .i ca lenu ko'i kargau ra kei le cmalu nanmu goi ko'a ca'o zvati .i le flira cu cmalu je se cinje .i lei kerfa ca'o zenba leka cinla .i barkalyle'o .i ko'a tatpi ke salpo sanli .i ko'i carna gi'e mo'ipa'o klama fo le briju fe la .bab.paen. i lu ko'a xrukla li'u co'e .i ko'i tunlo .i le flira cu kandi .i lu ko'a .u'e za'ure'u co'e li'u se cusku ko'i

.i lu ko zo'i sutra benji ta li'u co'e

.i ko'i sedmu'utu'i gi'e xrukla le canko .i lu doi .naun. ko .e'o klama le nenri .i le vipsi kagja'a cu djica lenu ze'i tavla do li'u

.i le flira be ko'a cu jarco leka se fanza .i lu .i .uanai ma krinu .i le trene zi cliva li'u se cusku ko'a .i ko'o noi ca'o smaji bacru cu catke kargau le vrogai gi'e nerkla le briju .i lu mi pu noroi lifri le simsa be ti .i za'a ju'o lemu'e terve'u lo pikta selpapri cu zenba leka nandu .i go mi fliba tu'a le trene gi mi fuzyji'i le kagni pe do li'u go'e

.i lu ta'a do'u ko zutse li'u se cusku ko'o noi jarco tu'a le stizu poi ragve fi le bijyjbu .i lu xu do du le nanmu noi djica tu'a lo pikta selpapri pe la .makyn.xaits. li'u go'i

.i lu xu la'e di'u cizra .i .uanai do'o mo .i do ki'u ma na'e kakne lenu vecnu lo pikta selpapri mi kei noi simsa lenu do pu di'i gasnu li'u se cusku ko'a

.i lu simsa .y. simsa le ki'a nu mi'o pu di'i gasnu li'u go'e

.i le cmalu nanmu cu sevzi fanta ta'i lenu nandu .i lu mi jo'u le fetspe be mi cu xa'ucne la .makyn.xaits. de'i le pavrelma'i be le me'imoi .i mi di'i litru fi le trene pe do reroi lo djedi ze'a loi masti be li xa .i mi vecnu lo cnino ke pikta selpapri di'i lo masti li'u se cusku ko'a

.i ko'o sevzi sa'orgau fa'a ko'a gi'e cusku lu do litru fi ma sa'e noi cmima le'i trene ku'o doi .naun. y. li'u

.i lu mi'e la .ernyst.kritcit. go'i fi la .bys. noi trene .i .o'onai xu do na'e se slabu le ciste pe do li'u go'e

.i lu ke'u me la .bys.tren. li'u se cusku ko'o noi lebna gi'e lanli le me la .bys.tren. cartu .i la .makyn.xaits. na'e te cartu .i lu lo'enu klama cu mentu ma li'u co'e

.i lu li sa'e voso li'u co'e .i la .kritcit. catlu le bitmu junla gi'e cusku lu co'e fi'o tcini lenu mi co'a se marce li'u

.i la .paen. kanji .i mentu be li voso .i zo'e bi'o le tcadu cu minli FIXME li ji'i cino .i ko'o sa'irbi'o gi'e klama le barda ke bitmu cartu .i ko'a xanka cusku lu re'i .o'unai li'u .i ko'o ciska le djine befi lu'e le minli be li cino le cartu .i le djine cu kruca so'o lu'e le tcadu .i ku'i lu'i ri na se cmima lu'e la .makyn.xaits. iji'a le linji pe la .bys. cu kruca no lu'e le tcana

.i lu .a'u la .makyn.xaits. mo li'u se cusku ko'o .i lu ma ni xabju be ri li'u go'i

.i ko'a cusku lu .i a'ucu'i li muki'o la'a .i mi ta'e zvati le tcadu .i mi se jibri le dinveicu'u pi'o la .bradcas.binras. li'u

.i lu xu la .makyn.xaits. cnino tcadu li'u go'e

.i lu .ieru'e ri zanyni'o .i mi'o ponse le cmalu ke se sipku'a be li re zdani noi zbasu pu le nanca be li so'u li'u se cusku ko'a .i ko'a xanka jai cfari .i lu .i .a'o pe'u lo pikta selpapri co'e li'u co'e

.i ko'o masno spusku fi lu .i .uanai .u'u mi na'e kakne lenu vecnu lo pikta selpapri do li'u

.i lu .i .ue ma krinu li'u co'e

.i lu mi'o na'e selfu fi tu'a la .makyn.xaits. li'u co'e

.i ko'a sutra sa'irbi'o gi'e cusku lu .i .uanai ke'o li'u

.i ko'o cusku lu .i no le stuzi cu se cmene ta .i ko viska le cartu li'u

.i ko'a se spaji ke moklu kargau gi'e flira slilu .i ko'a zi fengu carna le bitmu cartu gi'e carmi catlu ri

.i ko'o smaji cusku lu .i ja'o cizra tcini .i ta na te cartu .iji'a le tcadu ke gidva cukta pe le gugypau na sitna ta .i no lei selpla cartu pe mi'o sitna ta .i lei pikta selpapri pe ta na'e se zbasu li'u ce'o lo'u .i mi'o na'e le'u .i ko'o sisti .i ko'a puzi canci .i pamai ko'a pu lanli le cartu .i remai ko'a to'e zvati .i ba'o canci .ipe'a ba'o se gusydicra .i ko'o ki'asku lu doi .djakybsyn. ta to'e zvati li'u .i lei kanla be ko'i mutce kalri binxo .i le mebri cu te xasne .i lu .i ju'o .u'e ta go'i li'u se cusku ko'i .i ko'o noi catlu le kunti se zvati be ko'a cu pensi .i lu .i .u'esai ca'o mutce cizra fasnu li'u se cusku ko'o .i ko'o suksa lebna le kosta gi'e klama le vrogai

.i ko'i pikci cusku lu .i .oi ko na'e cliva mi li'u

.i lu .i .e'e mi ba zvati le kumyzda be la .loras. i le vreji be le fonjudri be ri se sorcu le bijyjbu pe mi li'u se cusku ko'o

.i lu .i ti na'e mapti lezu'o kelci .i'enai fi'o kansa lei ninmu li'u co'e

.i ko'o catke kargau le vrogai be le balku'a gi'e cusku lu .i zo'onai mi mutce senpi ledu'u ti nu kelci li'u

ni'o la .paen. goi ko'o sutra cpare le serti le kumyzda be la .loras.nikyls. .i ko'o ru'i jai danre le vorme vruca'a pu'o lenu le vrogai cu kalri .i lu doi .bab. li'u se cusku la .loras. goi ko'e noi kalgaisligau ri'a leza'i se spaji .i lu .i .ue ki'u ma do klama li'u go'i

.i ko'o catke bezo'a ko'e klama le nenri be le kumyzda gi'e cusku lu .i .e'e .a'o mi na'e jai dicra tu'a da li'u

.i lu na go'i ku'i li'u go'e

.i lu ta'a banli fasnu .i mi nitcu lenu do sidju .i xu do kakne li'u se cusku ko'o

.i lu .i .uanai mi sidju ki'a li'u go'e .i ko'e ga'orgau le vrogai .i le kumyzda noi pluka se jadni cu va ve'e manku .i le tergu'i cu lamji le kojna be le sfofa .i lei canko cu se murta lei denmi .i smaji zgike tu'a le cukyku'ovelvei cabra bebu'u le kojna

.i ko'o sevzi renro vreta le banli ke crino sfofa gi'e cusku lu .i la'aru'e mi co'a jai fenki .i .ai mi djica leza'i djuno lejei go'i li'u

.i lu .i .i'e ta'i ma mi sidju li'u se cusku ko'e noi jbikla .i ko'e kucysimgau le'i birka gi'e jgari le sigja lei ctebi gi'e desygau lei clani kerfa mo'ito'o lei kanla .i lu .i .o'e do pensi ma sa'e li'u se cusku ko'e

.i ko'o cismyfra le ninmu gi'e cusku lu .i .i'o zo'o do ba se spaji .i mi djica lenu do klama le tcadu velnarge ca le bavlamdei cerni ti'u le clira li'u

.i lu ta'a bavlamdei cerni .o'onai mi di'i jibri .iji'a lepu'u zbasu lo porsi befi le'i datynoi cu cfari zi le cabjeftu bu'u le briju li'u go'e

.i lu .i .a'unaisai .i ko na'e gunka ze'a le cerni .i ko ba klama le ralju ckuzda .i go vi ri do na cilre le datni gi ko klama le flapaizda befi le tertca gi'e co'a sisku fi le'i tolci'o ke cteki vreji .i ko sisku pu'o lenu do facki ta li'u co'e

.i lu me ta ki'a .i ke'u co'e pu'o lenu mi facki ma li'u co'e

.i ko'o pensi jelgau le sigja gi'e spusku fi lu .i go'i fi le sitna be le stuzi noi se cmene la .makyn.xaits. i ju'o mi pu tirna tu'a le cmene .i purci lo nanca be li so'o .i xu do co'a jimpe .i ko sisku fi le'i tolci'o catycku .i go'i fi le'i tolci'o djekarni ne le zumtcidu kumfa .i co'e le'i karni ja datynoi ja selti'i ja selti'ifla li'u

.i ko'e co'a masno zutse le birka be le sfofa gi'e cusku lu .i zo'opei co'e li'u

.i lu zo'onai li'u se cusku ko'o

.i lu .i purci lo nanca be ma li'u se cusku ko'e

.i lu li pano la'aru'e .ijo da'i sarcu li'u go'e

.i lu .i .uesai la'a tu'a mi sarcu li'u go'e

.i lu ta'a do'u ko ba na'e cliva pu lenu do facki .i co'o li'u go'e .i ko'o suksa sa'irbi'o

.i ko'e cusku lu .i .uinai za'a do cliva .i xu do ba na'e kansa mi lenu mi'o citka le vacysai li'u

.i lu .i .u'u mi bazi tolcando .i ke'u mutce leka tolcando li'u se cusku ko'o noi co'a klama le vrogai

.i lu tolcando sezu'e ma li'u se cusku ko'e

.i lu lenu vitke fi la .makyn.xaits. li'u co'e

ni'o le trene cu te jvinu lei pintu'a noi pe'a vi ve'e kuspe .i so'u cange dinju .i ke lunbe cilsraga'a ke'e jo'u ke vanci tsani .i ko'o sutra catlu le kanjunla .i lu .i na'e darno li'u co'e .i le trene cu litru pa'o le cmalu tcadu .i so'u da ke livla zarci ke'e ja ke mlana be le dargu zarci .i veltivni zarci .i sisti bu'u le tcana fi'o se sance lenu jabre sraku .i lu me la .luesbyrg. li'u co'e .i su'o le litru cu cliva .i ri nanmu gi'e dasni le kosta gi'e bevri le vanci djekarni .i lei vrogai cu cladu ga'orbi'o .i le trene cu co'a klama

ni'o ko'o noi pensi cu surla vreta le stizu .i la .kritcit. goi ko'a pu canci ca lenu catlu le bitmu cartu .i ko'a pu pare'u canci ca lenu la .djakybsyn. jarco tu'a le se tcana cartu kei no'u lenu ko'a facki ledu'u la'e la .makyn.xaits. na zasti .i lu xu tu'a ta vajni li'u co'e .i piro lei fasnu cu cizra je simlu be leka selsne .i ko'o ze'o catlu .i ko'o jibni fi'o tcini da'i leza'i le se jibni cu zasti .i lei bunre pintu'a cu vive'e kuspe .i ke cmalu cmana ke'e jo'u sasfoi .i cilsraga'a .i lei karce noi simlu leka mutce be leka cmalu be'o je xekri cu ca'o klama fo le dargu .i ku'i noda sinxa ledu'u la .makyn.xaits. cu jibni .i le trene cu caivru klama .i ko'o tcidu fi le kanjunla .i lo mentu be li mupa cu temci lemu'e cfari .i .u'acu'i ko'o facki noda gi'e puze'a viska lei sasfoi po'o

ni'o ko'o dzukla fo le selre'e gi'e zutse re'o le selma'etro noi blaci kerfa ke tolcitno nanmu .i lu xu do se slabu le stuzi noi se cmene la .makyn.xaits li'u preti fi ko'o

.i lu na go'i doi .naun. li'u co'e

.i ko'o jarco tu'a le kagni jaspu pe ko'o gi'e te preti lu .i xu ju'opei da poi se cmene na slabu do li'u

.i lu .i ju'o go'i doi .naun.paen. li'u co'e

.i lu .i do gunka le vi pluta ze'a ma li'u co'e

.i lu .i doi .naun.paen. lo nanca be li papa li'u co'e

ni'o ko'o se marce pu tu'a le za'umoi tcana ne la .djaksynvil. i ko'o cliva gi'e zi co'a se marce le me by. trene beseka'a le ti'a tcadu .i le solri mo'u canci .i le tsani cu xekri .i ko'o kandi viska le tumla pa'o le canko .i ko'o zenba leka tinsa .i lu balvi fi lo mentu be li pa .i go'i fi lo snidu be li vono .i .u'e xu da bartu li'u co'e .i pinta sasfoi .i lunbe cilsraga'a .i kunti ke jbini be le'i tcadu be'o tumla .i lu jbini ki'a li'u co'e .i le trene ca'o sutra klama .i ko'o ze'o tinsa catlu .i lu .i xu da bartu .i xu da poi na'e sasfoi cu go'i li'u co'e .i le clani ke se gusni danmo cu ve'u gapru lei sasfoi .i ra manfo gi'e kuspe lo minli be li ji'i pa .i lu .i tu mo .i .u'e xu tu danmo cei broda tu'a le matra .i ku'i ri se livlrdizli .i xu broda lo bevma'e noi litru le dargu .i xu go'i lo spafoi fagri .i za'a no lei sasfoi puzi jelca li'u co'e .i suksa fa lenu le trene co'a masno .i ko'o sutra ke jundi binxo .i tu'a le trene ca'o se sisti .ipe'a lei jabre cu cmoni .ije lei selre'e cu slilu desku .ibazibo smaji .i le xadycla nanmu goi fo'a zi'e noi va zutse cu sa'irbi'o ce'o dasni be le mapku be'o ce'o sutra klama le vrogai .i fo'a plipe le loldi le trene .i ko'o kucli catlu .i fo'a sutra dzukla na'ebo le trene fo lei manku sasfoi .i fo'a zukte klama lei grusi danmo .i fo'a galmu'u .i fo'a ca'o cadzu fi le gapru be le loldi bei lo mitre be li pimu .i fo'a ri'u carna .i fo'a za'ure'u galmu'u lo mitre gi'e ze'i cadzu pa'a le loldi mo'ito'o le trene .ibazibo fo'a canci mo'ine'i lei danmo .i mo'u go'i

ni'o ko'o sutra klama fo le midju vorme .i ku'i le trene co'a zenba leka sutra .i le bartu loldi cu to'o muvdu .i ko'o facki fi tu'a le selma'etro noi salpo vreta le selma'e bitmu zi'e noi plana flira citnau

.i lu ju'i .i le puzi tcana cu mo li'u se ke rufsu cusku ko'o

.i lu ke'o doi .naun. li'u se cusku le sema'etro goi fo'e

.i lu .i .o'onai ta noi tcana .i .o'unaisai ma'a pu zvati ma li'u go'e

.i lu .i ma'a puze'e di'i denpa fi tu'a ta li'u go'e .i fo'e masno setca le xance le kosta gi'e tolse'a lei selpla cartu .i fo'e sisku fi lu'i ri gi'e dunda pa ri ko'o .i fo'e cusku lu .i la .bys. di'i denpa fi tu'a la .makyn.xaits. .i xu do na'e djuno li'u

.i lu .i .uesai na go'i li'u go'e

.i fo'e cusku lu .i ta se sitna le selpla cartu li'u .i fo'e di'a tcidu le plekarni .i lu .i .a'ucu'i zo'e di'i denpa fi tu'a ta .i puze'e go'i .i ze'eba go'i li'u co'e

.i ko'o katna telcaugau le selpla cartu .i je'u la .makyn.xaits. se sitna fi ledu'u ri midju la .djaksynvil. ce'o la .luesbyrg. kei .e ledu'u zo'e bi'i le tcadu cu minli li cino sa'e .i lu pu dilnu le grusi danmo .i le ganra dilnu pu ca'o sutra ke tarmi binxo tai lenu da co'a zasti .i ju'o sa'e da co'a zasti .i .u'esai da du la .makyn.xaits. li'u co'e

ni'o ca le bavlamdei cerni ko'o dicra penmi la .loras. goi ko'e le kumyzda .i ko'e noi dasni le xunblabi nivycreka .e le xekri palku cu zutse fa'a le tordu jubme noi se cpana le derxi be lei xatra be'o .e le pinsi .e le selpisyvictci .e le ladru sovda

.i ko'o te preti fi lu .i xu do pu snada li'u

.i lu .i go'i .i mi ba'o cpacu lei datna pe do li'u te spuda ko'e

.i lu .i ri mo li'u go'e

.i lu .i so'imei datni .i mi ba'o ciska le torvelski be lei ralju li'u go'e .i ko'e satre le xatra se papri

.i ko'o cusku lu .i .i'e ko benji le torvelski li'u

.i ko'e cusku lu .i pu lo nanca be li ze le tertca trukamni cu casnu tu'a ci le cnino ke jarbu zdagunma goi fo'a zi'e noi pu pu'o se zbasu te'e le tcadu .i la .makyn.xaits. cmima fo'a .i lenu casnu cu banli .i piso'e lei tcadu vecnu cu fapro fi lesi'o zbasu fo'a .iki'ubo fo'a ba nu'o trina pidu'e leinu ka canja cuntu kei pe le tcadu li'u

.i lu je'e re'i li'u co'e

.i lu pu ze'u nu da'asnu .ija'ebo tu'a re lu'i fo'a pu se zanru .i la .uatyrvil. e. la .sidyr.grovs. enai ku'i la .makyn.xaits. go'i

.i ko'o pensi ke smaji cusku lu je'e li'u

.i ko'e cusku lu .i tu'a la .makyn.xaits. pu ba'o tolzau .i le tugni zo'u re le'i zdagunma goi fo'i cu basti fo'a .i fo'i puzi mo'u se zbasu .i do pu viska .i mi'o paroi klama pa'o la .uatyrvil. ti'u le lecydo'i i za'a ta jai pluka je cmalu tcadu li'u

.i ko'e cusku lu .i ku'i la .makyn.xaits. na co'e li'u

.i go'e lu .i go'i .i tu'a la .makyn.xaits. ba'o na'e te platu li'u

.i ko'o satre le xedja gi'e cusku lu .i ta mulno lisri .uanai li'u

.i go'e lu .i go'i .i .o'onai do jimpe ledu'u mi na'e jerna fi tu'a piro le djedi ri'a le vi cuntu .i do bilga lenu kansa mi ze'a le zi vanci .i ju'ocu'i mi pu'o sisku le drata nanmu .i mi co'a jinvi ledu'u do na'e xamgu mi li'u

.i ko'o toljundi sedmu'utu'i gi'e cusku lu .i .u'e purci lo nanca be li ze li'u .i suksa fa lenu da co'a sidbo fi ko'o .i lu .i .a'usai lemu'e cmicu'a .i leni cmicu'a be tu'a la .makyn.xaits. cu mleca fo ma li'u co'e

.i ko'e lanli lei notci gi'e cusku lu li pa .i ta ba'o te jinga ki'u pa le cmicu'a li'u

.i ko'o klama le vorme ca lenu cusku lu .i pa lo cmicu'a .i purci lo nanca be li ze .i ki'e doi dirba mi co'a jimpe .i .uasai ba'e go'i li'u

ni'o ko'o vi le bartu co'a se marce le lejykarce .i ri joi ko'o sutra klama le trene tcana fo le tcadu .i ze'oku lei sinxa .a loi klaji cu mo'ito'o canci muvdu .i lei prenu .a lei zarci .a lei karce cu go'i .i le se jijyji'i be ko'o cu drani .i ko'o se slabu lemu'e sitna le cmene .i ri purci lo nanca be li ze .i dunku ke tertca nu da'asnu le se stidi ke jarbu zdagunma .i tu'a re le tcadu ba'o se zanru .i pa zo'e ba'o te jinga je tolmorji .i ku'i le tolmorji tcadu co'a zasti ba lo nanca be li ze .i le tcadu ku joi le vrici pagbu be lei zasti cu go'i .i lu .i .u'e ma krinu .i xu da poi purci ba'o cenba .i xu lenu cenba cu ba'o fasnu sera'a le purci munje li'u .i la'e di'u simlu leka drani .i leni cmicu'a cu jibni .i tu'a la .makyn.xaits. cu naru'e pu zanru .i la'aru'e so'u lei pagbu be le purci cu na'e stodi .i la'aru'e le temci noi purci lo nanca be li ze cu mutce leka vajni .i la'aru'e le go'i na mo'u dunja pe'a .i le cizra sidbo zo'u le purci ca'o cenba ba'o le fasnu befa ri

ni'o suksa fa lenu ko'o co'a viska jundi .i ko'o co'a sirji zutse .i pa'o le klaji za sinxa ga'u le cmalu zarci .i ca lenu le lejykarce cu mo'ica'u muvdu kei ko'o troci lenu viska .i lu la .bradcas.binras. ja gubni ke flalu vreji finti li'u se tcidu fi le sinxa .i ko'o pensi .i ta goi fo'o jibri be la .kritcit. stuzi .i xu fo'o ji'a zasti slilu .i xu fo'o pu ze'e se stuzi .i tu'a le srana be fo'o cu mukti lenu ko'o to'e surla .i ko'o minde lu ko zengau fi leka sutra li'u fi le sazri .i lu .i .e'osai mi'o ca'o klama li'u co'e

ni'o le trene cu jdika leka sutra za la .makyn.xaits .icabo ko'o sutra sa'irbi'o gi'e klama le vrogai .i tu'a lei xislu noi mosra se sance cu bikla se dicra .i ko'o mo'ini'a plipe le glare ke cmaro'i loldi .i ko'o ru'u catlu .i fi'o te gusni le lecydo'i solri la .makyn.xaits. minra carmi .i lei manfo lijgri be fi le'i zdani ru'u ze'o preja .i le banli sinxa be le kindi'u cu midju be le tcadu be'o sanli .i lu .i .ue kindi'u do'anai li'u co'e .i ko'o klama fo le te trene fe le farna be le tcadu .i fe'eba'o le tcana cu sropanka .i ko'o co'a cadzu ra gi'e kruca klama fo le pluta be le dagmlaterdzu re'o le livla zarci .i ko'o mo'u klama le ralju be le'i klaji pe le tcadu .i re le lijgri befi le'i zarci cu kuspe pe'a ca'u ko'o lu .i za'a tutci zarci .i re le ve mikce zarci cu co'e .i to'e kargu zarci .i .u'e zanyni'o pagzai li'u co'e

ni'o ko'o surla cadzu je catlu la .makyn.xaits. i va clani je ganra ke zdani dinju .i le dinju kurji ca'o lumci lei crane serti .i roda pe le tcadu cu simlu leka cnino je zanyni'o .i lei zdani .e lei zarci .e lei dargu .e lei dagmlaterdzu cu go'i .i lei marce sorcu ve pleji junla cu go'i .i le pulji noi dasni le bunre manfyta'u cu ca'o punji le ve sfasa notci le karce .i lei tricu cu cnici leka pezli clani gi'e fe'edi'i se sombo .i ko'o cadzu mo'izo'a le barda zarci .i le baktu be lei grute noi najnimre jo'u vanjba cu crane ra .i ko'o crepa le vanjba gi'e batci citka .i ju'o ri vanjba .i barda je xekri me la .kankord. i titla je makcu .i ku'i pu lo cacra be li revo ve'u kunti sasfoi

ni'o ko'o nerkla pa le ve mikce zarci .i ko'o na'e jundi tcidu so'u lei karni gi'e zi co'a zutse re'o le kajna .i ko'o tervencpe le kabri be le ckafi le xunre flira ke cmalu ke fetsi bevri goi fo'a

.i lu ti pluka tcadu li'u se cusku la .paen. ca lenu fo'a dunda le ckafi

.i fo'a cusku lu .i .ie go'i li'u

.i ko'o denpa fo lenu cusku lu ma .y. temci lezu'o do vi se jibri li'u

.i lu lo masti be li ci li'u co'e

.i lu .i .u'e masti li ci .i xu do vi xabju la .makyn.xaits. li'u se cusku ko'o noi catlu le cmalu ninmu

.i lu go'i li'u co'e

.i lu ma temci li'u go'e

.i lu .i ju'ocu'i lo nanca be li so'u li'u .i fo'a to'o klama tezu'e lenu selfu le citno sonci noi puzi co'a va zutse

.i ko'o ca'o pinxe le ckafi gi'e sigva'u gi'e na'e jundi catlu lei prenu noi mo'izo'a klama .i fadni prenu .i nanmu je ninmu .i leni ninmu cu zmadu .i le so'omei cu bevri lei zarci dakli gi'a pilno lei cmalu ke cilta carce .i lei karce vi ja va masno klama .i to'u smaji je cmalu jarbu bo tcadu .i zanyni'o je ricfu je xamgu tcadu .i no lei vi zdani cu xlali .i cmalu je melbi zdani .i lei zarci cu se crane lei sasfoi gi'e se jadni lei navni tergu'i sinxa

ni'o lei so'o verba tadni noi cmila je simxu lenu catke cu suksa nerkla le zarci .i re le nixli noi dasni le carmi skari nivycreka zi'e goi ko'i co'a zutse ne'a ko'o gi'e tervencpe lei ri'ornimre se pinxe .i ko'i gleki casnu .i so'u lei pagbu be lenu casnu cu se sanji ko'o noi pensi catlu ko'i

.i lu ta fatci ju'o .i ctebi bo cinta .ije xunre bo jgalu .i nivycreka .ije so'imei be le'i cukta .i le sa'enai xectomei be le'i verba tadni cu gleki ke gunma nerkla le ve mikce zarci li'u co'e

.i ko'o tatpi satre le mebri .i ti na'e simlu leka cumki .i lu .i la'aru'e tu'a mi na'e racli .i le tcadu cu fatci .u'e .i ba'e je'u fatci .i sarcu fa ledu'u ri puze'e zasti .i lenu le mulno tcadu cu se finti fo noda .a lei grusi danmo cu na cumki .i le muki'omei be le'i prenu be'o .e lei zdani .e lei klaji .e lei zarci cu zvati .i ke'u zarci .u'e .i me la .bradcas.binras. li'u co'e

.i lenu suksa jimpe cu jenca ko'o .i le fasnu ca'o preja fi tu'a la .makyn.xaits. fe le tcadu .i le tcadu ca'o cenba ji'a .i la .bradcas.binras. mu'a noi stuzi le jibri be la .kritcit. cu co'e .i leza'i la .makyn.xaits. zasti cu nibli lenu le tcadu cu cizra cenba .i la'e di'u se gunma .i lei muki'o prenu goi ko'u pu klama fi le tcadu .i jibri ko'u .i .u'e nu se jmive ko'u .i le tcadu cu se srana .i ku'i .ii le'a ma go'i .i le tcadu cenba fi ma .i ko'o renro punji le sicni le kajna gi'e sutra cliva le zarci mo'ifa'a le trene tcana .i ko'o carmi djica lenu xrukla le tcadu .i lu .i .iisai la .loras. .i pu mu'e cenba .i xu ly. za'o vu zvati .i xu le nunji'e be mi cu snura li'u co'e .ipe'a leka terpa cu jgari ko'o .i la .loras. e lei se ponse .e lei platu .e lei se pacna cu mo .i tu'a la .makyn.xaits. co'a simlu na'ebo leka vajni .i le lifri be ko'o cu se ckape .i pa da po'o ca vajni .i ko'o carmi djica lenu ko'o birti ledu'u lei tcini pe ko'o za'o co'e je to'e se stika be lepe'a djine be leka cenba noipe'a boxna preja fi la .makyn.xaits.

ni'o lu ma se klama doi pend. li'u se cusku le lejykarce sazri ca lenu ko'o sutra cliva le tcana .i ko'o cusku lu'e le judri be le kumyzda .i le lejykarce ze'o muvdu le klafle .i ko'o xanka ke vreta zutse .i lei klaji .e lei briju dinju mo'izo'a muvdu .i so'i le se briju ca'o cliva .i lu'o ri preja lei dagmlaterdzu gi'e jmaji lei kojna

.i lu ba'o cenba fi ma li'u co'e .i ko'o jundi le lijgri befi le'i dinju .i lu .i xu le barda pagzai pu ze'e se stuzi ta li'u co'e .i le re'o cmalu cutci bo zarci zo'u ko'o pu noroi zgana .i la'e lu me la .noris. zdani nilce li'u zo'u ko'o na'e morji tu'a ta .i ku'i ko'o nu'o birti ta'i ma .i ko'o cfipu .i lu ta'i ma mi jdice li'u co'e

ni'o ko'o cliva le lejykarce ca'u le se kumyzda gi'e ze'i sanli je sruri catlu .i fe'eco'u le klaji pagbu le terzai be le itlo gusta cu tengau le bukpu drudi .i lu .i xu mi pu su'oroi zgana lo gusta tu'i ta li'u co'e .i ko'o na'e kakne lenu morji .i lu le barda rectu bo zarci noi pu ragve le klaji cu mo li'u co'e .i vaku leipo'o cnici cmalu bo zdani noi tolci'o zi'enoi la'a puve'u se stuzi .i lu .i xu ta su'oroi stuzi lo rectu zarci .i lei zdani cu viska simlu leka sligu li'u co'e

.i bu'u le lamji ke klaji pagbu le grana sinxa be le kerfa katna zarci cu gusminra .i lu .i xu le zarci roroi se stuzi va li'u co'e .i lu .i la'acu'i go'i .ija la'acu'i na go'i .i roda ca'o cenba .i su'oda ca'o co'a zasti .ije lei drata cu to'e go'i .i lei purci ca'o cenba gi'e srana leka morji .i ki'u ma mi larci leka morji .i ta'i ma mi birti li'u co'e .i ko'o camte'a .i lu la .loras. mo .i le tcini pe mi cu mo li'u co'e .i ko'o sutra klama fo lei serti gi'e catke kalri le vrogai befo le kumyzda dinju .i ko'o mo'iga'u klama le remoi dijysenta fo le bukpu gacri serti .i le vrogai be le kumyzda cu to'e se stela .i ko'o catke kargau ri gi'e terpa nerkla ca lenu ru'i smaji pikci .i le surla kumfa cu manku je smaji .i lei murta cu xadba ganlo .i le labybla sfofa cu se cpana lei plekarni .i tordu ke cindu mudri jubme .i ve tivni .i ku'i le kumfa cu kunti .i ko'o smaji cusku lu la .loras. li'u

.i la .loras. goi ko'e zi'enoi kanla kalri xalni cu sutra klama fi le jupku'a gi'e cusku lu doi .bab. ki'u ma do mo'u xrukla le zdani .i xu da nabmi li'u

.i ko'o co'a surla .i lu coi dirba .o'eri'e li'u co'e .i ko'o cinba je tagji bo jgari ko'e .i ko'e glare je sligu je dacti ju'o .i lu .i na go'i .i noda nabmi .i roda xamgu li'u se cusku ko'o

.i lu .i xu do birti li'u se cusku ko'e

.i lu go'i li'u go'e .i ca lenu cinmo desku kei ko'o vimcu le kosta gi'e falcru ri le sfofa .i ko'o sruri be le kumfa be'o dzukla gi'e catlu so'uda co'a lenu za'ure'u lacri .i le slabu be ko'o labybla bo sfofa noi se barna fi lei sigja festi cu co'e .i le se xrani ke tordu bo stizu po ko'o cu co'e .i le jubme noi ko'o di'i nicte gunka sepi'o ke'a cu co'e .i lei finpe kalte tutci po ko'o cu salpo vreta le bitmu ti'a le cukta kajna .i le barda ve tivni noi ko'o te vecnu pu po'o lo masti cu snura ji'a .i tu'a ro lei se ponse be ko'o cu na'e se stika .i .iinai snura je na'e se xrani

ni'o la .loras. noi vimcu le jupkosta cu xanka ke smaji cusku lu .i le vacysai mo'u jukpa ba lo cacra be li pimu .i .u'u lenu do clira xrukla cu spaji mi .i mi surla po'o ze'a le zi donri .i ku'i mi ba'o lumci le jupsfe .i so'u lo vecnu pu dunda fi le mupli be le'i cnino velylu'i li'u

.i lu je'e .i'e li'u co'e .i ko'o catlu le prina pixra befi la .renuar. be'o noi traji leka ko'o nelci .i ko'o cusku lu .i .o'o ko na'e xanka sutra .i .ui pluka fa lenu za'ure'u viska lu'o ti .i mi li'u

.i klaku sance tu'a le sipku'a .i ko'e sutra carna gi'e cusku lu .i pe'i tu'a mi'o rinka lenu la .djimis. cikna li'u

.i lu la .djimis. ki'a li'u se cusku ko'o

.i ko'e cmila cusku lu .i .u'i xu doi dirba do na'e morji fi le do'anai bersa be do li'u co'e

.i lu .i je'a go'i li'u go'e sekai leka se fanza .i ko'o masno jersi ko'e noi klama le sipku'a .i lu .uanai roda puzize'i simlu leka cizra li'u se cusku ko'o noi frumu je satre be le mebri .i lu go'i leka cizra je fange taipe'a to'e klina li'u go'i .i ko'o jo'u ko'e sanli re'o le vercka gi'e catlu le cifnu .i la .djimis. carmi catlu lei rirni

.i lu .i .uu la'a tu'a le solri pu rinka .i le tcima cu carmi leka glare li'u se cusku ko'e

.i lu .i je'e .ie pe'i do'u mi ca kanro li'u se cusku ko'o noi mo'ini'a tengau gi'e pencu le cifnu .i ko'o sruri punji le birka le fetspe gi'e jgari ri .i ko'o cusku lu .i ju'o .iusai tu'a le solri ba'o rinka li'u .i ko'o catlu lei kanla pe ko'e gi'e cisma

fa'o

lujvo

© 2021 Wolfgang Corcoran-Mathe. Released under a Creative Commons Attribution 4.0 International license.

Home