.i la .edgyr.alyn.pos. finti
.i zo'e xe fanva la'e zoi gy. The Masque Of The Red Death gy. le glibau fu la .zaifir.
ni'o la xunre nunmro goi ko'a pu ze'u daspo le gugde .i lo terbi'a ze'epu noroi zmadu ko'a loka ckape .e loka selte'a .ipe'a lo ciblu cu xadni je sinxa be ko'a .i loka xunre jo'u selte'a pe lo ciblu cu go'i .i ko'a zo'u carmi bo cortu jo'u suksa carmalga'e .ibabo sutra blucri ra'i lo kapkevna ca lonu bi'arze'a .i lo xunre morna be le xadni .e le flira be lo te bilma cu sinxa loka se dapma .imu'ibo no lo prenu cu sidju ja xendo .i lepu'u bi'arbi'o ce'o farvi ce'o fanmo kei pe le terbi'a cu cacra li pimu
ni'o ku'i la .nol.prosperos. goi ko'a gleki je virnu je prije .i co'i lonu pimu lo nilxa'u befi lei tutra be ko'a cu morsi kei ko'a klacpe fi le selzva be ri lei pa ki'o ki'o kanro je xalbo pendo bele'a lei xirno'i ja fetno'i ku pe le ko'a nolzda .i ko'a jo'u ra klama pa le ko'a badydi'u malsi goi ko'i zi'e noi mutce loka sivni .i ko'i noi barda je banli dinju cu te platu ko'a noi banli ju cizra fi loka jdice .i lo tsali je galte bitmu cu sruri ko'i .i ra se bimvrogai ma'e lo tirse .i lei nolkansa goi ko'o ba lonu nerkla cu bevri lo toknu ku jo'u lo tilju mruli le bimvrogai gi'e runme lasna lei klupe .i ko'o jdice lodu'u na'e sabgau lo pluta be lo nenri .a lo bartu lo nenri prenu poi suksa cinmo loka badri ja jai fenki .i ko'i ricfu lo sorcu .i ki'u la'e di'u ko'o kakne lonu renvi tu'a lo terbi'a .i roda poi bartu cu kakne lozu'o kurji ri .i cabo lozu'o da badri gi'a pensi cu selbebna .i ko'a sabji ro le'i zdile no'u lo xampre ku ce lo nalbrezu'e terpemci ku ce lo dansu ku ce lo zgipre ku ce lope'a ka melbi ku ce lo vanju .ipe'a le sego'i jo'u loza'i snura cu nenri .i la xunre nunmro cu bartu
ni'o ca lenu ko'a pu'o mo'u sepli ze'a lo masti be li mu .a li xa kei ca ji'a lonu le nunsorbi'a cu xlarai vi le bartu kei la .nol.prosperos. zdigau fi le pa ki'o ki'o pendo be ko'a lo ticta'u tersla noi rirci loka banli
ni'o le ticta'u tersla cu fasnu sekai loka carmi pluka .iku'i pamai mi skicu lei kumfa poi se zvati le go'i .i ra banli zemei .i ku'i lo'e tai kumgri noi se stuzi lo badydi'u cu clani je sirji .iji'a lonu lo se polje vrogai pe ra ti'a sakli muvdu lo bitmu cu rinka loza'i lo jvinu be roda cu se klina .i le vi tcini cu frica sei la'e di'u nalspaji ki'u loka ce'u prami ro da poi cizra kei pe le nolraitru .i le stura be le'i kumfa cu vitci .iseri'abo lonu viska za'upa ri cu tolcu'i to'i li'o toi .i lo cnino cu zvati ro lo kruvi .i lo frasuje canko noi rajycla je jarki zu'a je ri'u midju lo bitmu gi'e te jvinu lo vorme noi lamji piro le kumgri .i ro le canko cu te marji lo selcinta blaci noi mapti lei jadni be le se canko kumfa loka skari .imu'a le kumfa poi traji loka stuna cu se jadni le blanu .ije carmi blanu fa le canko pe ru .i le jadni je bukybimgai pe le remoi be le'i kumfa cu zirpu .ije le canko blaci vi zirpu .i roda pe le cimoi cu crino .i le canko go'i .i le vomoi cu se nilce je se gusni cei broda lo narju .i le mumoi cu broda lo blabi .i le xamoi cu broda lo labzi'u .i le zemoi be le'i kumfa be'o goi ko'u se bukybimgai lo xekri demsilka noi gacri ve'a le drudi ku bi'i le bitmu ku'o gi'epe'a farlu tai lo se polje derxi tu'a le buklolgai noi simsa befi loka marji .e loka skari .i ne'ipo'o ko'u lei canko na mapti lei jadni loka skari .i le vi canko blaci cu carmi ke ciblu xunre .i ne'iki le ze kumfa lo tergu'i na cmima lu'i le solji jadni noi vi ja va se cunfaigau gi'a dandu lo drudi .i noda gusni fi lo gapci livla tergu'i .a lo laktergu'i ne'ikiku .i ku'i ne'i le vorme poi lamji le kumgri re'o ro le canko cu sanli fa lo cibytu'e zbepi be lo fagri .i lo gusli'i befi ra cu pagre lo selcinta blaci gi'e rufsu gusni lo kumfa seri'a lo cizra to'i li'o toi selvi'a .i ne'i ko'u no'u le stici je xekri kumfa loza'i lo fagygu'i noi pagre le ciblu se skari ke canko blaci cu gusni lo xekri bukybimgai cu traji loka pruxi selte'a .i lo flira be lo prenu cu simlu loka cilce fo loza'i zvati ko'u .isemu'ibo so'upo'o le'i kansa cu milxe nerkla ko'u
ni'o re'o le stici bitmu be ko'u sanli fa le barda junla bema'e lo mudri be lo persimo be'o be'o goi fo'a .i le dadysli pe fo'a to'o ja fa'a slilu fi'o sance lo jimdaxsna noi kandi je rapli bo fanza .i co'i lonu le mentu merli ve junla mo'u sruri klama le sefta be fo'a kei no'u lonu lu'e le tcika pu'o se notsku lepe'a ransu fepri be fo'a cu se sance lo curve je cladu je mutce be loka zgike be'o noi ku'i cizra fi loka selto'a .e loka smuni .isemu'ibo fi'o terdikni lo cacra be li pa le se balzgibe'e cu ze'i denpa lonu tirna la'e di'u fo lonu selzgi .isi'a loi dansu cu sisti lozu'o carna .i piro lei gleki kansa ze'i se cfipu .i ca lonu lo janbe be fo'a cu selsna kei le traji be loka bebgei cu labybi'o .ije le tolci'o je junri zmadu cu satre le ri mebri le xance tai loza'i ce'u cfipu sipna gi'a pensi .iku'i co'u lonu mirsna kei lei kansa cu milxe cmila .i le'i zgipre cu simxu lonu catlu kei gi'e cisma tai lonu sevzi ckasu fi loka xanka je bebna kei gi'e simxu lonu smaba'u nupre lonu lo za'umoi be lo'inu darxi kei pe fo'a cu na'e rinka lonu simsa cinmo .i ba lo mentu be li xano to'i li'o toi fo'a za'ure'u selsna .ije fasnu fa lenu tolkufra jo'u xanka desku jo'u pensi kei noi simsa lo purci
ni'o mu'inai la'e lu'o de'u le tersla cu nu gleki je banli .i lei se nelci be le nolraitru goi ko'a cu cizra .i ko'a stati lonu ce'u cuxna lo zilska .a lo larcu tcila .i ko'a toljundi lo jadni poi zasni misno .i tu'a lo selpla be ko'a cu seldarsi .ije loi sidbo befi ko'a cu ckaji loka cilce carmi .i .ia lo so'o prenu cu jinvi lodu'u ko'a jai fenki kei goi fo'e .i lei kansa be ko'a cu birti to'ebo fo'e .i roda zo'u lonu da tirna jo'u viska jo'u pencu ko'a cu sarcu loza'i da birti lodu'u fo'e jitfa
ni'o .i ko'a ralju fi loka ce'u jitro tu'a lei muvdu kakne jadni be le ze kumfa kei sera'a lenu banli tersla .iji'a lei ticta'u salci cu ckaji tu'a le ko'a ka jdice .i ju'o ri tolmletce .i za'a so'ida ckaji loka gusycai .a loka gusminra .a lope'a ka cpina .a loka pruxi fange sei lo so'esi'e be la'e di'u cu se zgana befo tu'a la'e la .xernanis. i lo pluja taxfu xadni zo'u lo se jimca je se jadni cu na'e mapti .i zvati fa le bilma senva voi simsa da poi se finti lo fenki prenu .i zvati fa so'e lo melbi .e so'e lo xalbo .e so'e lo cizra .e so'o lo selte'a .eji'a so'o da noi la'acu'i rigni .i le so'imei be le'i selsne prenu be'o goi fo'i vi ja va cadzu ne'i le ze kumfa .i fo'i mo'ine'i ja mo'iru'u torni dansu gi'e skari befe tu'a le kumfa be'o binxo .i le zgike noi cilce cu simlu lope'a ka ce'u morna minra lonu fo'i tapkla .ibakiku sance le mudrnpersimo junla noi sanli ne'i le demsilka kumfa .i le tersla ze'i smaji ca tu'a po'o lepe'a voksa be le junla .i lei selsne cu pe'a dunja tinsa sanli .i ku'i lonu mirsna be tu'a le janbe goi fo'o snocanci sei fo'o cu po'o ze'i snidu .i le nunmi'a noi ruble je milxe be loka se fanta cu pe'a fulta jersi fo'o noi cliva .izibo le zgike za'ure'u laurbi'o .ije fo'i cu jmive binxo gi'e vi ja va torni dansu sekai loka caizma gleki kei gi'e skari fe tu'a lei vrici be loka skari kei canko noi se pagre loi gusli'i befi lei cibytu'e zbepi kiku .iza'a le traji be loka stici bei lu'i le zemei be'o kumfa ca se klama no le ticta'u salci .i leza'i nicte cu ca'o co'e .i lo xunmau gusni cu pagre lei ciblu se skari canko blaci .ije leka xekri be lei murta cu jai mukti lonu terpa .i lo prenu poi stapa le xekri buklolgai cu tirna ra'i le vi mudrnpersimo junla lo se smagai seljanbe noi zmadu loka jundi je se basna kei ro le sance poi se tirna le prenu poi salci bu'u le drata kumfa
ni'o ku'i le drata kumfa cu mutce loka predenmi .i pe'a je ne'iku le risna be lo kamji'e cu carmi slilu .i le tersla ca'o co'e sekai loka cilce carna kei pu lenu le junla co'a selsna notsku lu'e lo ctemidju .i ke'u le zgike cu se sisti .i lonu lei dansu ru'i carna cu binxo loka smaji .i xanka nu se sisti tai le purci .i ku'i caku li pare se klani leni darxi be le janbe pe le junla .i la'a ja'ebo lo caizma za'i pensi cu se lifri le kampeikai noi cmima le'i tersla .i ja'ebo pu lonu le romoi be le'i mirsna be le romoi be le'i junla selsna cu mo'u jdika ji'e loza'i smaji ku kei so'i le se predenmi cu kakne lonu sajbi'o loza'i zvati fa le selticta'u noi pu na'e se jundi .i lei kansa cu smaba'u casnu le nuzba be ra .ibazi cfari fa lenu desku sance cmoni be fi loka tolzau je se spaji ku ce'o bazabo loka carmi terpa je se rigni
ni'o la'a da sruma lodu'u lo simlu be loka fadni na'e ka'e mukti le go'i va'o le vi jmaji .i je'u le ticta'u tersla cu mutce loka se curmi .i ku'i le vi selticta'u cu jai bancu fo leka drani befo le nolraitru kei noi cunso .i le do'anai traji be loka ckape prami zo'u lope'a nu se pencu le cinmo gitsko cu rinka lonu cinmo .i do'anai lope'a traji be loka farcri be'o noi xalbo lo kamji'e .e loka morsi cu na'e xalbo lo so'u cuntu .i za'a piro lei jmaji cu jinvi lodu'u le fange selticta'u goi ko'i zo'u lenu ko'i tarti ku jo'u lenu ko'i dasni cu na'e ke xajmi ja drani .i ko'i xadycla je bilma cinla gi'e mipri dasni le mrota'u .i le firgai be ko'a cu se zbasu setai lo flira be lo tinsa mroxadni .iri'abo lonu ganse loka drata cu nandu fi lo do'anai zu'o jundi lanli .iku'i lei vi fenki salci cu la'a curmi je do'anai zanru la'e lu'o de'u .iku'i ko'i darsi lonu jarco tu'a lo selbi'a fi la xunre nunmro .i le se dasni be ko'i cu se barna fi lo ciblu .i le mebri noi ganra ku jo'u piro le flira cu go'i fi lepe'a xunre selte'a
ni'o le vi pruxi tolcanci no'u ko'i cu vi ja va masno je banli cadzu va'o lei dansu mu'i la'a lonu zenba to'i li'o toi .i la .nol.prosperos. goi ko'a ca lonu viska ko'i cu simlu loka vlile cinmo .itaibo pamai ko'a carmi desku ri'a lonu camte'a ja rigni .i remai le mebri be ko'a cu xunre binxo ri'a lonu fengu .i ko'a rufsu voksa cusku lu ma darsi li'u lei nolkansa poi vi sanli ku'o gi'e go'i lu o'onai ma darsi lonu te mabla mi tai le .i'enaire'e vi ve ckasu .i ko ri'urgau ta gi'e to'e gairgau tezu'e lonu mi'o djuno lodu'u mi'o dadycatra makau le badydi'u garna co'i lo solnuntolcanci li'u .i ko'a bacru di'u ne'i le stuna je blanu kumfa .i ra noi cladu je se filsmu cu sance preja le ze kumfa .iri'abo ge ko'a darsi je kanro gi le zgike cu smaji binxo co'i lenu ko'a xansku
ni'o ne'i le blanu kumfa le nolraitru cu sanli va'o lei terpa blabi nolkansa goi ko'o .i pamai ca lonu ko'a cusku ko'o milxe bikykla fa'a le zernerkla noi jibni gi'e bazi mo'ifa'a tolsnuti je banli cadzu klama le cusku .i mu'i loza'i ko'e manci kei noi se rinka le fenki pe ko'i ku'o ku no lo prenu cu troci lonu ri'urgau ko'i .ija'ebo ko'i na'e se zunti klama pa'o vi le nolraitru .i cagi lei barda kansa cu mo'ito'o klama le bitmu le midju be le kumfa gi ko'i na'e se dicra klama cei broda sekai leka junri je tolsnuti kei noi pu steci ko'i fi le zirpu kumfa fe le blanu .i ko'i broda fi le zirpu fe le crino .i broda fi le crino fe le narju .i ke'unai broda fi ri fe le blabi .i do'anai broda fe le labzi'u pu lonu su'o da troci lonu dicra tu'a ko'i .i la .nol.prosperos. noi carmi bo fengu je ckeji be lonu ke'a zasni toldarsi cu sutkla fo vu'i le'i xa kumfa
.icabo noda jersi ko'a mu'i loza'i roda carmi terpa .i ko'a ga'u jgari lo dakyxa'i gi'e sutra darsi jbikla ko'i noi mo'iti'a klama ku'o va lo mitre be li ji'i pa .icabo ko'i noi co'i nerkla le demsilka kumfa cu suksa carna gi'e fapype'i le jersi be ko'i .i suksa krixa .i le dakyxa'i cu farlu gi'e gusycai cpana le xekri buklolgai .ibazibo ri se farlu la .nol.prosperos. noi morsi vreta .i le girzu befi le'i salci be'o noi cilce darsi binxo kai lonu to'e pacna vu'o goi ko'o cu fengu sutkla le xekri kumfa gi'e lebna ko'i noi sirji sanli je to'e muvdu bu'u le ctino be le junla bema'e la .ebenis. .i ko'o vasxu cmoni fi loka nalcumselsku camte'a kei mu'i lonu facki lodu'u lei mrota'u ku jo'u le mroxadni firgai vu'o noi ko'o vlile jgari cu na se vasru lo dacti
ni'o ca jimpe fe lodu'u la xunre nunmro cu zvati .ipe'a ri klama tai lo nicte zerle'a .i to'i li'o toi le salci farlu ne'i le kumfa pe le vo'a tersla zi'e noi ciblu selba'a gi'e mrobi'o to'i li'o toi .i lepe'a kamji'e pe le junla cu se fanmo ca lonu le romoi be le'i gleki cu no'a .i fanmo le fagri pe le cibytu'e .i la manku ku jo'u la su'u se fusra ku jo'u la xunre nunmro ca ze'e turni roda
fa'o
© 2020 Wolfgang Corcoran-Mathe. Released under a Creative Commons Attribution 4.0 International license.