.i la obus.xenris. finti la'o gy. the cop and the anthem gy. noi se cukta la'o gy. the four million gy.
.i la zaifir. fanva
ni'o ve'i le stizu pe le me la madysyn.skuair. panka la sopis. goi ko'a cu xanka muvdu .i lenu le cipni cu bacru zi le nicte kei .e lenu le ninmu poi na'e ponse lo kerfa kosta cu co'a xendo le speni kei .e lenu la sopis. xanka muvdu le ko'a panka stizu cu sinxa ledu'u le dunra cu zi cfari
ni'o le morsi pezli cu farlu lei tuple pe la sopis. i ta notci fi la djak.dunras. i la djak. goi ko'i xendo le xabju be la madysyn.skuair. gi'e ta'e benji lu'e le kajde befi le nanca nu ko'i vitke .i ve'a lo te kruca be vo lo klaji ko'i dunda le karda la berti brife noi selfu le nobli zdani no'u la banli bartu .itezu'ebo le xabju be ri cu kakne lenu bregau
ni'o le menli pe la sopis. cu sanji ledu'u sarcu fa lenu ganzu le sevzi le kamni be lenu bandu le ba nandu .isemu'ibo ko'a xanka muvdu ve'i le stizu
ni'o leza'i kufra sipna kei noi se djica la sopis. cu na'e banli .i ko'a na'e djica lenu pluka litru la medityranian. va'o le sipna rinka tsani pe la vesuviys.zbanis. i le masti be li ci ve'a la daplu cu se djica le ko'a pruxi .i le masti be li ci za'i se marbi je pendo kansa je snura be la boriys. e lo pulji cu simlu fi la sopis. le traji be leka se djica
ni'o ze'a lei nanca la blakuels.daplus. noi se kufra cu dunra zdani ko'a .i simsa fa lenu lai nu,iorkyrs. noi zmadu fi leka se xaurfu'a cu te vecnu lo pikta befi tu'a la palm.xaskois. a la rivieras. zi le dunra kei fe lenu la sopis. ta'e pindi bregau fi le ko'a nanca nu klama la daplu .i le djedi be ra cu cabna .i ze'a le prulamcte ci le zeldei djekarni noi fatri lu'o le nenri be le kosta .e le jamfu .e le tuple cu na'e banzu lenu fanta tu'a le lenku ca lenu ko'a sipna vreta le stizu zi le je'erjinto pe le tolci'o panka .imu'ibo la daplu cu mutce leka barda je srana ga'a la sopis. i ko'a te mabla le se sabji bemu'i lenu pidydju kei befi lei lacri be le tcadu .i la sopis. jinvi ledu'u la flalu cu zmadu la remna prami leka xamgu .i ci'imei le'i kagni noi ka'e sabji lo se xabju .e lo cidja vu'o poi mapti le sampu tcaci .iku'i la sopis. noi jgira cu jinvi ledu'u lo cpacu befi lo pidydju cu to'e zifre .i le ckeji .onai le jdini cu se pleji fo ro le xamgu poi se dunda lesi'o pidydju .i la sisyr. co'e la brutys. isi'a ro le ckana pe lesi'o pidydju cu se cteki lenu jirsezlu'i .i ro le nanba cu ve pleji le sivni nu preti talsa .imu'ibo zmadu fi leka xamgu fa leza'i vitke la flalu noi se ganzu lo javni zi'eku'i noi na'e dukse sisku le'i sivni
ni'o la sopis. noi jdice fi lenu klama la daplu cu co'a troci le se djica be ko'a .i le tadji be ra cu so'imei je frili .i leka pluka cu se traji lenu da banli citka va'o lo kargu gusta gi'e se pifygau ba lenu xusra ledu'u pindi kei lo pulji sekainai leka dunku .i lo pajni poi sidju cu mulgau
ni'o la sopis. cliva le stizu gi'e dzukla fi le panka le xamsi befi le dagysfe fe le te jorne be la broduais. bei la muroi klaji .i ko'a carna fi la broduais. gi'e sisti re'o le banli gusta noi se jmaji lei traji befo le'i se zbasu befi le vanjba .a le sikcurnu .a le selci
ni'o la sopis. virnu ve'i le betfu ku bi'i le stedu .i ko'a pu se firkrevi'u .ije le kosta cu xamgu .ije le xekri dadne'ota'u cu se dunda lo ninmu jdaternoi za le kirdei .i go ko'a ba'o na'e se ganse klama pa le jubme pe le gusta gi ko'a snada .i le spisa be ko'a poi se viska ga'u le jubme cu jai na'e mukti lenu le bevri cu senpi .i le datka poi se jukpa fi le fagri cu mapti sei la sopis. se jinvi .i ra joi lo botpi be le me la cablis. be'o ku ce'o le cirlrkamumberti ku joi le ckafi ku joi le sigja cu go'i .i lo rupnu be li pa cu banzu tu'a lo sigja .i tu'a le sumji noi na'e barda cu na'e mukti lenu banli venfu fa lei jatna be le gusta .iku'i le sanmi cu rinka leza'i ko'a culno je gleki ze'a lenu klama le ko'a dunra marbi
ni'o ba'o lenu la sopis. pagre le vorme le gusta kei le jatna bevri cu zgana le .uu se xrani palku .e le fusra cutci .i lei tsali je bredi ru'u cargau ko'a gi'e muvgau ko'a sekai leka smaji je sutra ku le dagmlaterdzu .ija'ebo le to'e nobli te dapma be le datka cu fanta
ni'o la sopis. cliva la broduais. i lenu klama le se djica daplu cu na'e se snada fi lo xadni pluka .i lenu finti le drata tadji be lenu nerkla le marbi cu sarcu
ni'o vi le kojna be la xaroi klaji lenu dikca gusni jo'u se vecnu se jarco ve'i le zarci canko cu jai rinka lenu ko'a jundi .i la sopis. lebna le dagysfe rokci gi'e renro fi le blaci .i lei prenu cu mo'ifa'a bajykla va le klaji kojna .i le pulji cu lidne .i la sopis. noi setca lei xance lei daski cu panpi sanli gi'e cisma mu'i lenu viska lei lastu te lasna
.i lu ma se zvati le zukte be ta li'u se reisku le pulji
.i lu .i zo'o xu do na'e jinpe ledu'u mi srana ta li'u se spusku la sopis. sekai leka ranxi jeku'i xendo kei tai lenu da rinsa le xaurfu'a
.i le menli be le pulji cu to'e kakne lenu pilno la sopis. ledo'anai sorcu be lo zekri datni .i lo'e prenu poi marxa lo canko na ta'e stali tezu'e lonu tavla lo pulji .i le go'i to'o bajra .i le pulji cu viska le nanmu poi va bajykla le karce .i le pulji noi jgari le xacyga'a cu cmibi'o le'i jersi .i la sopis. noi se rigni cu lazni cadzu .i ko'a ba'o remoi fliba
ni'o le cumla gusta goi ko'i cu ragve le klaji .i ko'i selfu lei mutce be leka xagji kei .e lei milxe be leka ricfu .i le palta .e le vacri vu'o pe ko'i denmi .i le stasu .e le lumci bukpu cu cinla .i mo'ine'i ko'i la sopis. bevri le jarco be leka pindi kei cutci .e le te lisri be leka pindi kei palku .i noda fanta .i ko'a zutse re'o le jubme gi'e citka le bakre'u .e le tapla nanba .e le jintitnanba .e le vasnanba .ice'o ko'a jarco le bevri leka ko'a se fange ledo'anai sicni befi le cmacai
.i lu ju'i do'u ko cpedu tu'a lo pulji li'u se cusku la sopis. i lu .iji'a .e'e na'e jai bapli lenu da denpa li'u go'i
.i lu no le pulji cu co'e do .i'enai li'u se cusku le bevri .i ri se voksa da poi simsa le matne titnanba gi'e se kanla da poi simsa le rutrceraso pe le me la manhatyn. xalxre .i lu doi la kan. li'u co'e
ni'o sekai leka cnici kei lei re bevri cu renro la sopis. le jdari dagysfe .i ko'a masno sa'irbi'o setai lenu to'e korcu kei gi'e darxi lumci lei taxfu le pulce .i lenu se puljykavbu cu simlu leka pluka senva .i la daplu simlu leka mutce be leka darno .i le pulji noi va sanli re'o le xukmi zarci cu cmila gi'e mo'ito'o klama fo le klaji
ni'o la sopis. ba'o klama ve'a mu lo lajypau pu'o lenu ko'a darsi lenu krefu troci .i ziku da poi ko'a skicu fo leka frili cu funca fasnu .i le ninmu noi simlu leka cnici gi'e pluka cu sanli re'o le zarci canko gi'e catlu sekai leka gleki se cinri kei le jarco be tu'a lei kabri .e lei ve ciska zbepi .i va le mitre be li re bei le canko le barda pulji noi simlu leka junri cu salpo sanli re'o le djacu sorcu
ni'o platu fa la sopis. lenu tarti leka cinse fanza kei noi se xebni gi'e se mabla .i leka nobli gi'e melbi kei pe leda'i se zerxai ge'u .e leza'i jibni fa le pulji noi vrude cu ve jinvi ledu'u le birka be ko'a cu bazi pluka se jgari le catni .ija'ebo dunra xabju le pluka ke cmalu daplu
ni'o la sopis. nicygau le dadne'ota'u pe le ninmu jdaternoi gi'e cpumuvgau lei creka tubnu karli le bartu gi'e salpo dasni le sedyta'u gi'e mlana dzukla le ninmu goi ko'o .i ko'a kanla cusku ko'o gi'e di'inai kafke gi'e bacru be lo'u xem. le'u gi'e cisma gi'e darsi tigni ro le to'e ke clite je se sinma liste pe le cinse fanza .i sepi'o le xadba be le kanla la sopis. sanji lenu le pulji cu catlu ko'a .i ko'o mo'ito'o klama lo mitre be li so'u gi'e xruti fi leza'i jundi lei kabri .i la sopis. jersi .i ko'a darsi dzukla le mlana be ko'o gi'e lafmuvgau le sedyta'u gi'e cusku lu coi doi bedilius. i xu do djica lenu kankla gi'e kelci ve'a le purdi be mi li'u
ni'o le pulji cu ca'o catlu .i leda'i nu le se fanza ninmu cu cpedu fo tu'a do'anai le degji cu krinu lenu la sopis. klama le daplu marbi .i ko'a se xanri leza'i kufra glare pe le pulji briju .i ko'o cargau fo ko'a gi'e jgari le kosta tubnu pe la sopis. fi le xance
.i lu vi'o doi mik. ui li'u se cusku ko'o .i lu .i .e'o do dunda mi le baktu be le fonmo .i mi puzi tavla do .iku'i le pulji cu catlu li'u go'i
ni'o ko'o sruri jgari ko'a tai lonu lo skospa cu sruri lo tricu .iseva'obo ko'a dzukla mo'izo'a le pulji sekai leka badri .i ko'a simlu leka se dapma fi leza'i zifre
ni'o vi le za'umoi kojna ko'a rivbi lenu ko'o kansa kei gi'e bajra .i ko'a sisti ve'a le tcadu pagbu noi ze'a lo nicte cu se zvati lei traji be leka se gusni be'o klaji .e le prenu .e le nu nupre kei .e le lisri vu'o poi traji be leka xalbo .i lei ninmu noi dasni le kerfa ku'o .e lei nanmu noi dasni lei clani kosta cu gleki cadzu va'o le dunra vacri .i suksa fa lenu la sopis. terpa leda'i nu le makfa cu fanta lenu ko'a se puljykavbu .i ra rinka lenu milxe be leka xalni .i ca lenu ko'a facki fi le pulji noi banli ke vreta sanli re'o le se manci tigdi'u kei ko'a cu sutra jdice fi lenu kalsa tarti zekri
ni'o va le dagmlaterdzu la sopis. co'a bacru lei xalka fenki savru serai leka cladu .i ko'a dansu gi'e krixa gi'e darlu gi'e jai fanza lei tsani
ni'o le pulji cu kelci le xacyga'a gi'e carna to'o la sopis. gi'e cusku fi le xabju fe lu .i ta te ckule be fa la jail. i ra salci lenu xrani le me la xartfyrd. ckule .i cladu jeku'i na'e ckape .i mi'o se minde fi lenu curmi li'u
ni'o la sopis. noi badri cu sisti le na'e te snada zu'o vruri'a .i da'i .uu lo pulji na ze'e kavbu ko'a .i lenu snada tu'a la daplu cu simlu leka to'e cumki .i ko'a ganlo lasna le kosta noi cinla ku tezu'e lenu bandu tu'a le lenku brife
ni'o va le zarci be lo sigja ko'a viska ko'u goi le melbi dasni nanmu noi jelgau le sigja fi'o sorcu le dandu tergu'i .i le silka santa pe ko'u pu se punji fi le vorme ba'o lenu ko'u nerkla .i la sopis. nerkla gi'e lebna le santa gi'e masno cadzu cliva .i ko'u sutra jersi
.i lu le santa po mi li'u se ke junri cusku ko'u
.i lu .i .ionai xu ti go'i li'u se cusku ko'a noi jmina lenu te mabla kei lenu zerle'a .i lu .i ko cpedu tu'a lo pulji .i mi pu lebna ti .i le santa pe do .ike'u ko cpedu tu'a lo pulji .i pa ri sanli ve'i le kojna li'u go'i
.i le se ponse be le santa cu jdika leka cadzu sutra .i la sopis. gasnu le simsa gi'e krici ledu'u le funca cu xlali ko'a .i le pulji cu catlu lei re prenu sekai leka kucli
.i lu vi'o li'u se cusku ko'u .i lu .y. sa'e .y. do djuno ledu'u di'i fasnu fa lenu srera .y. kei ne ti .i mi .y .i go do ponse le santa gi do .e'o fraxu mi .i mi .u'u lebna ta zi le cerni vi le gusta .i go do ganse leka do ponse ta gi mi pacna do .y. li'u go'i
.i lu .i ju'o .ionaisai mi ponse li'u se ke fengu cusku la sopis.
.i le za'o santa nanmu cu xruti .i le pulji cu sutra klama le ragve be le klaji tezu'e le .u'i nu sidju le claga'u ke pelxu bo kerfa ninmu noi dasni le banli kosta zi'e poi crane le karce poi zo'i klama fi re lo lajypau
ni'o la sopis. mo'idu'a cadzu veka'a le klaji poi se xrani lepu'u xagzengau .i ko'a fengu renro le santa le skuro .i ko'a smaji bacru te mabla fe lei prenu voi dasni lo badmapku gi'e te xarci lo xacyga'a .i ki'u leza'i ko'a djica lenu se kavbu ku kei ra te simlu leka nobli je drani kei ko'a
ni'o bazaku la sopis. zvati pa le stuna klaji noi milxe leka se gusni je kalsa .i ko'a co'a klama fo ra fe la madysyn.skuair. iseki'ubo le zdani xruti rarna cu renvi ledo'a za'i le zdani cu panka stizu
ni'o ku'i ve'a le kojna poi to'e fadni leka smaji ku la sopis. cu sisti .i ti tolci'o malsi .i ri pluja gi'e pluka slabu leka se platu .i le canko noi zirpu cu se pagre le kandi gusni .iju'o le pipno zgica'a ne'i stali gi'e ca'o zenba leka certu lozu'o tigni le ba zeldei selsa'a .i le zgike noi melbi cu ze'o preja lei kerlo pe la sopis. gi'e kavbu je se rinju ko'a lenu manci kei re'o le morna pe le tirse bitmu
ni'o le ga'u lunra melbi gi'e panpi .i le marce .e le cadzu cu so'umei .i lei cipni cu bacru ve'a le drudi korbi .i ze'iku le stuzi cu simsa le nurma ke malsi purdi .i le selsa'a poi le zgica'a cu tigni ke'a cu se rinju la sopis. re'o le bitmu .imu'ibo ko'a se slabu le go'i ze'a le pu za'i ko'a se vanbi lo mamta .e lo rozgu .e lo djica .e lo pendo .e lo karli
ni'o leza'i la sopis. menli tcini ku joi lenu te cinmo fi le slabu malsi cu suksa ke xamgu galfi le ruxse'i .i ko'a catlu sekai leka suksa terpa kei le kevna poi ko'a ba'o se farlu .i go'i lei xlali lifri .e lei to'e se vamji nu djica .e lei morsi pacna .e lei spofu rango .e lei se mabla mukti vu'o voi se gunma leza'i jmive pe ko'a
ni'o ziku ko'a spuda le cnano leka carmi be leka cinmo .i leka djica kei noi rarna je tsali cu bapli lenu damba le se mabla dimna be ko'a .i ko'a te mukti lenu cpumuvgau le sevzi fi le cimde'u .i go'i lenu xruti leza'i virnu .i go'i lenu ko'a jinga fi le palci poi se rinju .i le temci cu banzu .i ko'a ca'o citno .i ko'a te mukti lenu xruti tu'a lei puzu djica kei .e lenu troci ri lezu'o to'e sisti .i lei vi tonga noi junri jeku'i pluka cu cfagau lenu binxo pe ko'a .i mukti lenu ze'a le bavlamdei ko'a klama le nu canja kei pagbu be le tcadu gi'e facki fi lo jibri .i le ve canja be lo kerfa puzu friti fi ko'a fe le jibri besegau lozu'o sazri .i mukti lenu ko'a facki fi le go'i ze'a le bavlamdei gi'e cpedu le jibri .i xanri fa loza'i ko'a vajni .i ko'a ba zukte seisa'a se dicra
ni'o la sopis. sanji lenu le xance cu jgira le birka .i ko'a sutra lenu catlu le ganra flira be le pulji
.i lu do vi gasnu ma li'u se cusku le pulji
.i lu noda li'u se cusku la sopis.
.i lu .i .e'e ko kankla li'u go'e
ni'o lu .i ju'a masti li ci ve'a la daplu li'u se cusku le pajni pe le pulji flapaizda zi le cerni
fa'o
© 2024 Wolfgang Corcoran-Mathe. Released under the terms of the Creative Commons Attribution 4.0 International license.