ni'o la mark.radjyrs. goi ko'a se jibri lezu'o sisku leka kunra .i ko'a klama la cmaplini dasri tezu'e lenu sisku tu'a le dirce .e le rirci jinme .i ko'a sisku ze'a lo nanca be li so'o gi'e milxe leka facki gi'e litru lo spisa ce'o lo spisa .ibazaku ko'a co'a xabju le bliku be lo rokci noi ki'otre fi leka rotsu
ni'o la radjyrs. slabu mo'u lenu jbena kei gi'e na'e bancu fi leka to'e citno .i le flira cu kensa blaci .iji'a le xance cu milxe leka desku .i ko'a te cmene le bliku pe ko'a lu la martas. li'u noi cmene no le ninmu poi ko'a se pendo
ni'o ko'a snada lonu cmalu facki kei noi banzu lenu sabji fi la martas fe le vacri pambe .e le zdani .e loi dertu noi megdo grake li so'u kei .e le vasru be lo djacu be'o .e le sampre .ibabo ko'a vreta gi'e catlu lei tarci
ni'o le sampre poi ko'a te vecnu cu vrici gunka gi'e vasru le sorcu be le'i cino valsi .i la mark. jmina fi ra ru'inaiku .i ko'a ta'e gunka lezu'o minji jai stika kei gi'e se zdile lepu'u gau zmadu fa le vanbi leka ko'a kufra .i le sampre goi ko'i kakne lonu cusku po'o lu vi'o doido'u li'u .e lu na go'i doido'u li'u .i ko'i ka'e skicu le sampu nabmi .imu'a lu le pambe cu se nandu doido'u li'u .i lu le gurni cu banro doido'u li'u mu'anai .i ko'i ka'e gasnu le banzu nu rinsa po'u lu coi doido'u li'u .i la mark. galfi la'e lu'o de'u .i ko'a vimcu lu'o lu doido'u li'u le ko'i sorcu be lo valsi .i leza'i noda nobli cu se javni fi le rokci bliku pe la mark. .iji'a ko'a te cmene le sampre lu la tcaryls. li'u noi cmene le patfu noi ko'a noroi penmi
ni'o baze'uku le pambe co'a se nandu lepu'u zbasu lo vasxu cumki varxamsi lo se rokci kijno pe le cmaplini .i lo vacri cu se flecu fi lo kensa .i le pambe noi bai sabji lo zmadu cu zenba leka gunka .i lei gurni ca'o se ferti lei purdi ke xekri dertu pe le cmaplini .i ca lenu catlu le gapru kei la mark. viska le kensa rirxe noi carmi leka xekri ku'o .e lei fulta mokca po'u lei tarci .i ru'u je ni'a je ga'u ko'a lo bliku be lo rokci ru'i muvdu .i lo gusni befi lo tarci di'inai se minra lo xekri mlana be sy. .i so'uroiku la mark. ze'i viska la vonplin. .a la mumplin. .i ko'a paroi viska da poi simlu leka terdi
ni'o gau la mark. co'a vreji fi le cnino te spuda la tcaryls. .i ko'a jmina lu'e le sampu te spuda be le sinxa valsi .i la tcaryls. spuda lonu ko'a cusku lu ti mo kei tu'a lu .a'u xamgu pe'i li'u .i puze'aku lei spuda cu mintu da poi la mark. spuda tu'a vo'a sepa'u lenu sevzi casnu kei noi nanca be li so'o .iku'i sekai leka masno kei ko'a finti lei cnino se tarti be la tcaryls. .i la mark. ze'u to'e lacri je fengu loi ninmu .iku'i ko'a na jmina leka go'i kei la tcaryls. .i lei se jinvi be la tcaryls. cu mutce leka frica
ni'o lu do jinvi ma loi ninmu li'u ta'e se reisku la mark. noi zutse le tanxe vi le bartu be le zdani ba'o lonu gunka
.i xi ty. lu mi na'e birti .i sarcu fa lenu do facki fi le mapti li'u .i le sampre ta'e fuzme spuda fi lonu cusku lo se vreji
.i lu mi punai penmi lo xamgu li'u ta'e se cusku la mark.
.i xi ty. lu .o'o ta jursa .i la'a leni do sisku na banzu .i ro lo nanmu cu mapti su'o lo ninmu li'u
.i lu .ionai do dukse leka prami cinmo li'u se cusku la mark. .i le sampre cu denpa to lo te platu nu denpa toi ce'o bacru lo se finti nu cmila
.i lu mi pu paroi senva tu'a lo ninmu beme'e lu la martas. li'u sei la tcaryls. ta'e cusku .i la'aru'e go mi sisku gi mi facki fi my. li'u .i caku tcika lenu co'a sipna .ija la'aru'e la mark. djica lenu ranji fa lenu casnu .i lu do jinvi ma loi ninmu li'u za'umoi se reisku ko'a .i lenu casnu cu ranji tai le simsa
ni'o la tcaryls. zenba leni to'e citno .i le jimca co'a tinsa .iji'a piso'o lei cilta co'a kijyselspo .i la mark. cikre le sampre ze'a lo nanca be li so'o .i lu do zenba leka kijyselspo li'u se ke cmila cusku la mark.
.i lu do si'a na'e citno li'u te spuda la tcaryls. .i ko'i ka'e spuda so'a da .i zo'e na'e pluja jeku'i te spuda
ni'o leza'i nicte cu vitno ve'a la martas. .iku'i la mark. fendi le temci pe ko'a le cerni ku ce le donri ku ce le vanci .i lei se zukte be ko'a joi ko'i cu se ganzu fo le sampu tcaci .i nu cersai lei stagi .e da poi krasi le lante sorcu pe la mark. .ibabo le sampre cu gunka ve'a le purdi .i lei spati co'a se slabu lonu ko'i pencu .i la mark. cikre le pambe gi'e merli tu'a le djacu sorcu gi'e ganzu lei nilce be le zdani noi traji be leka jinsa .i nu dormijysai .ibabo lei se fuzme be le sampre cu na'o mulno .i le remei cu zutse le tanxe gi'e catlu lei tarci .i le go'i ta'e casnu pu'o lenu vacysai .ija so'uroi ze'u go'i ca le vitno nicte
ni'o la mark. ze'a jmina le zmadu be leka pluja be'o te spuda la tcaryls. .i ju'o ko'a na ka'e dunda leka cuxna zifre kei le sampre .i ku'i ko'a snada tu'a le jibni be ru .i lei steci be la tcaryls. cu masno se finti .i ku'i le go'i cu frica lei steci be la mark. .i la mark. se fanza da poi la tcaryls. panpi .i la mark. ckaji leka ranxi .iju'e la tcaryls. stace .i la mark. xlamu'ijijnu .iju'e la tcaryls. ckaji leka pacna .i la mark. ta'e badri .iju'e la tcaryls. roroi sarxe .iji'a baku la mark. co'i morji ledu'u ko'a finti lei te spuda befi la tcaryls. .i ko'a tugni ledu'u le sampre cu pendo gi'e jibni ko'a leni lifri .i le ze'u pendo
ni'o lu da poi mi na'e jimpe zo'u sei la mark. ta'e cusku mu'i ma lo prenu no'u do djica leza'i xabju ti .i ti xamgu mi .i'a .i noda jundi mi .iji'a mi pu jundi no lo prenu .iku'i ma mukti fi do li'u
.i lu viku mi ponse le mulno munje sei la tcaryls. ta'e spuda .iku'i ve'a le terdi da bai fatri mi joi lei gigdo .i mi ponse lei tarci noi zmadu da pe le terdi leka barda .e leka carmi .i .u'e piro le kensa cu sruri mi .i jibni pa'a le smaji lalxu .iji'a .i'i mi kansa do doi mark. li'u
.i xi my. lu .aunai ko na'e dukse leka cinmo li'u
.i xi ty. lu na go'i .i leza'i pendo cu vajni .i leza'i prami cu puze'u se cirko doi mark. .i za'i prami fa le ninmu beme'e lu la martas. li'u vu'o noi mi'o noroi penmi .i .uinai ta se badri .iku'i leza'i pendo cu renvi .iji'a .u'e le vitno za'i nicte li'u
.i lu .uesai do se mabla te pemci sei la mark. milxe be leka sinma be'o cusku .i .u'i le xlali pemci li'u
ni'o xaksu le temci secau lenu lei tarci cu jundi .i le vacri pambe cu se sincysna gi'e se jimdaxsna gi'e cirko lo vacri .i la mark. di'isai cikre .iku'i lei vacri be la martas. ca'o jdika leka denmi .i gu la tcaryls. gunka ve'a lei purdi gi lei gurni noi na sabji le banzu ni vacri cu morsi .i la mark. ca tatpi gi'e ka'eru'e cpare klama fi'odo'a te junta le ruble .i ko'a na'o vreta le ko'a ckana .i la tcaryls. troci lonu ko'a citka kei gi'e klama fu tu'a le kijyselspo je krixa jimca
ni'o lu do jinvi ma loi ninmu li'u
.i xi my. lu mi punai penmi lo xamgu li'u
.i xi ty. lu .o'o ta jursa li'u
ni'o ri'a leza'i tatpi kei la mark. na jimpe ledu'u bazi fanmo .ije la tcaryls. na cinri .iku'i lenu fanmo cu jibni .i le vacri pambe cu nupre lenu bazi fliba .i leza'i citka noda cu djedi li so'o
ni'o lu .iku'i ma mukti fi do li'u .i carmi vasxu va'o le vacri noi ca'o se cirko .i jibni lonu vasxu sisti
.i xi ty. lu viku mi ponse le mulno munje li'u
.i xi my. lu ko na'e dukse leka prami cinmo li'u
.i xi ty. lu ji'a leza'i prami fa le ninmu beme'e lu la martas. li'u li'u
.i vi la ckana la mark. rore'u catlu lei tarci .i barda .i zmadu ro le purci leka barda .i vitno leka fulta le smaji lalxu no'u le kensa .i lu lei tarci sei la mark. cusku li'u
.i xi ty. lu je'e .a'a li'u
.i xi my. lu pau le solri li'u
.i xi ty. lu te gusni pa'a le cabna li'u
.i xi my. lu lo se mabla pemci li'u
.i xi ty. lu lo xlali pemci li'u
.i xi my. lu .ije pau loi ninmu li'u
.i xi ty. lo'u mi pu paroi senva lo ninmu beme'e lu la martas. li'u .i la'aru'e go mi to se dicra toi le'u
.i lu do jinvi ma loi ninmu .i go'i loi tarci .i go'i le terdi li'u se cusku ko'a .ibabo tcika lenu caze'e sipna .i la tcaryls. sanli re'o le xadni be le pendo .i ko'i paroi troci lenu ganse tu'a le risna lenu pencu gi'e ba curmi lenu le sudga xance cu farlu .i ko'i klama lo kojna be le zdani gi'e gau sisti fa le tatpi pambe .i le fenra ke tordu pagbu be le srivelvei poi la mark. finti cu se ralte .i lu mi pacna lenu my. facki fi la martas. pe my. li'u se ke ruble cusku le sampre .ibabo le srivelvei cu porpi .i lei kijyselspo jimca na kakne lenu korcu .i ko'i sanli gi'e minra catlu lei lunbe tarci .ibabo ko'i dzimuvgau le stedu. .i lu le turni cu jitro mi sei la tcaryls. cusku .i mi na'e claxu .i ty. gasnu lenu mi vreta lei crino purdi .i ty. gidva mi to li'o toi li'u
Copyright note: As far as I know, Beside Still Waters is in the public domain. The transcribers of the Project Gutenberg version state: “Extensive research did not uncover any evidence that the U.S. copyright on this publication was renewed.”
ti papi'erexamoi vreji / Version 1.26
© 2024 Wolfgang Corcoran-Mathe. Released under the terms of the Creative Commons Attribution 4.0 International license.